Anhte Wunpawng Mungdan Shanglawt lu na matu woi-awn ningshawng tai nga ai Hkungga, tsaw ra kam hpa ai, Myu tsaw, Mung tsaw share shagan ni e…
Ya yang e anhte Jinghpaw Wunpawng Mung daw hte lahta Sam mung hta KIA ni hte myen ni gasat nga ai hte seng nna anhte Buga kaw na ni gaw n-dai hku mu mada ga ai. Ya anhte ni gaw shi ga hpe gaw madung hku nna Radio hte DVB , TV ni madat, yu nna sha, myit n-dik ka-un nga ga ai.
Ya yang e gap hkat nga ai lam hpe kachyi mi mung n mai jahkring na re, gap hkat jahkring na nga yang anhte Buga hkan e nga ai amyu sha ni grai pawt wa ma ai. Gap hkat jahkring na lam hpe kachyi mi pyi n hkraw ma ai. Anhte Buga shara shagu hkan e nga nga ai amyu sha ni mung rawt malan magam hkrun lam hta shang lawm na matu yawng jin jin sha re.
Hpa majaw nga yang, ya aten hta, mung masha ni sha jamjau nga ga ai re. Anhte hpe Myen hpyen ni gaw roi rip ai, zingri ai, dip da ai, dai zawn re ai hpe kachyi mi pyi n ra sharawng ga ai. N kam hkam ga ai. Matut nna mung zingri na, roi rip na sha naw rai nga ai. Raitim ya yang gaw anhte Buga shara shagu hta nga nga ga ai amyu sha ni mung hkam sharang kau na re, machyi hkam kau na re, shanglawt lu wa ai shani gaw ngwi pyaw na re hpe myit mada let, ya yang e gaw machyi hkam kau na ga ai. Rawt malan gasat na magam bungli hta mung shang lawm na jin jin rai nga saga ai. Lu ai laknak hpai, lang nna gasat na re. Ya na zawn re ai rawt malan hkrun lam hta gaw machyi mung hkam ra ai, sum mung sum hkam ra ai, si mung si hkam ra ai lam hpe anhte chye na nga ga ai. Dai rai yang she lani mi hta anhte myit mada ai pandung rai nga ai manu dan ai shanglawt nam chyim lu na re.
Lai wa sai aten ni hta mung anhte a kanu kawa ni, kashu kasha ni a du, baw, law law ap nawng lai wa ma sai. Dai ni yawng gaw anhte amyu sha ni shanglawt lu na matu arang bang ai lam rai sai. Hpa lam hta raitim arang bang ai lam nga ra ai. Arang bang ai ngu ai gaw kaman lila n rai na re. Nsin lai jang, nhtoi htoi wa na re.
Shanglawt ni rawt malan ai gaw ya na zawn n-hkru ai, n tara ai, Roi rip ai, zingri ai kaw na lawt na matu she rawt malan ai re. Myen hte bai pawng na matu n rai nga ai. KIO/KIA ningbaw kaba ni mung myen hte naw pawng mayu ai zawn zawn, n gwi ai zawn zawn hkum galaw nga mu, hkum ung-ang nga mu. Ya yang jamjau nga ai Mung masha ni hpe mung n-agam ra ai, awng dang hkra she shakut ga. Anhte amyu sha ni hpe Karai Kasang mung grai garum nga ai, matut nna mung garum na re. Anhte kam sham nga ai Asak Hkrung ai Karai Kasang gaw anhte a Awng Padang re.
Myu tsaw Shayi langai
Lambraw Yang
0 comments:
Post a Comment