Yubak mungkan pinra, n tsawm dik la maka
Hkaleng mawru kaba, wan hkru nnang wam nga,
Shinggyim mungkan chyam hkra, tsin-yam wulu pyau ra
Kaja hpa lam n nga, awu asin pri hkra,
Mani, daini, ya wa, Madu tsaw myit kata
Tara rap-ra n nga, adip kamyet hkrum sha,
N wai myiprwi si ra, Mungchying Myu sha yawng hkra
Sin dai pala gaw mya, ten tup myit hki pu ba,
Mungkan labau lungpa, malap n lu mai hkra
N htum hkayan zawn hpa, Munghpawm Myanmar gam maka.
Ngang grin hpa lam n nga, hten run mungkan pinra
Katsi kahtet hpyen wa, Chyurum Wunpawng Myu sha,
Shawng lam chyinghka kaba, htingkrang lakang dawm da
Wunpawng Mungdan chyam hkra, sai hka panglai nammukdara,
Chyu pala amyawk mawta, sai tawng sai pa lamun latsa
Ka-ak Kahka Langda, hkrap ngu madai aka,
Shingtai jahkrai gaida, gumgai dingla mung masha
Machyi hkrum sha sumhpa, du daw sai hkaw lai wa,
Share shagan ali ama, baw gum hkungga shagrau sha-a
Myu tsaw mung tsaw myit kaba, Wunpawng shing-ra gam maka.
Moi lai Jiwoi prat na, wudi Manau Htawngka
Majoi bum dung kaw na, Mungding ginma htumpa,
Tsit tsawm shagawng bum ga, rudi htingbut hting-ra
Katsi katsang hkrit hpa, lupwa kawng zawn she nga,
Wan hkat shadaw chyu hkra, nam u dusat hkring shara
Wunpawng sutgan yawng hkra, tsawm htap mungkan shing-ra,
Ahkaw ahkang yawng hkra, ginlut tat kau ra nga
Sai chyup ayai hpya sha, tinggyeng marin lawhpa,
Kraw dung salum kata, wan hkat ningwu chyu mya
Plastic prat hta grau hpa, Wunpawng Myu sha prat masa.
Oh… goi e…..
Rudi daidaw buga, dinghku majan sumhpa
Mungkan nan gara, yawng myit shang sha,
Sutgan yamnga, hkra rap kau da
Zing-ri hkrit kahpra, asak lawt hkra,
Majan tsin-yam , hprawng yen mun kaba
Kraw sung gindai, nyep myiprwi hkrai,
Pu gang sin mya, salum kapaw hkra
Kraw dung sai ga, Sai rum yawng hkra,
Sin dun lahkrip ra, hkum yup mau nga
Wunpawng shawng lam, nang ngai lit kaba.
Aga… bai ya daini…
Amyu sha yawng hpe tsawra, shingbyi lunghkrung Karai Wa…..
Daini annau ni wa, magup sumhpa yawng hkra,
Gyit hkang hpri sing-yu na, galoi hpyan lawt awng na
Wunpawng labau gam maka, kabrim htoi tu tsawm hkra,
Mungkan Wunpawng gu ra, lamu hpungtang kadu hkra
Kyuhpyi jahtau hkrap nga, kraw madai ningsen na ya,
Matsan dum pawn ba dun la, Padang ninghtoi chyinghka
Hkristu tsaw myit masa, mungkan shinggyim yawng hkra,
Shinggyim ahkaw ahkang rap-ra, Simsa Mungkan byin hkra
Myit mada ala kamhpa, galai shai ya rit Wa… Wa… Wa e…..
Bumwa Hkri Ma ( a ) Myu tsaw Hkri Ma
Fuji Majoi / Japan.
29.9.2011 ( Bat Mali ya ).
