Hugawng ............WPN
အမေရိကန်ပြည်ထောင်စုကို ဆရာမ လာရောက်တဲ့ အကြောင်းကို ပြောပြပေးပါ။
အမေရိကန်အစိုးရက ဖိတ်ကြားတဲ့အတွက် လာရောက်ခြင်း ဖြစ်ပါတယ်။ မြန်မာနိုင်ငံမှာ ဖြစ်ပွားနေတဲ့ ကချင်အရေး၊ တိုင်းရင်းသားအရေး၊ ပြည်တွင်းစစ်ကိစ္စနဲ့ ကချင်ဒေသတွေမှာ ဖြစ်ပေါ်နေတဲ့ လူ့အခွင့်အရေးကိစ္စတွေကို အမေရိကန်အစိုးရက သိရှိလိုတဲ့ အတွက်လာရောက်ခြင်း ဖြစ်ပါတယ်။ အမေရိကန်ကို ရောက်တုန်းရောက်ခိုက် ကချင်မျိုးနွယ်စုဝင် ညီအစ်ကိုမောင်နှမတွေနဲ့လည်း တွေ့ဆုံလိုတဲ့အတွက် ဒီနေရာကို ရောက်ရှိလာခြင်း ဖြစ်ပါတယ်။
ဆရာမအနေနဲ့ ကချင်လူမျိုးတွေအတွက် လူမှုရေး၊ နိုင်ငံရေးကိစ္စတွေမှာ အင်တိုက်အားတိုက် လှုပ်ရှားဆောင်ရွက်ပေးနေတယ်ဆိုတာကို ကျနော်တို့ ကြားသိရပါတယ်။ ရှေ့ဆက်ပြီးတော့ လုပ်ဆောင်မယ့် ဆရာမရဲ့ လုပ်ငန်းစဉ်ကို သိပါရစေ။
ကချင်လူမျိုးတွေအနေနဲ့ မိမိရဲ့နိုင်ငံရေးလမ်းစဉ်အတိုင်း ခိုင်ခိုင်မာမာ ရပ်တည်ဖို့က ပထမ နံပါတ်(၁) ဖြစ်ပါတယ်။ နိုင်ငံရေးမှာ ခိုင်ခိုင်မြဲမြဲ ရပ်တည်ရဲမှသာလျှင် ကျမတို့ လူမျိုးတွေရဲ့ ရပိုင်ခွင့်နဲ့ လိုအပ်ချက်တွေကို ရရှိမှာ ဖြစ်ပါတယ်။ ဒါ့ကြောင့် ဒီကနေ့ လူငယ်မောင်မယ်တွေအနေနဲ့ မိမိရဲ့ နိုင်ငံရေးရပ်တည်ချက်ကို သိရှိပြီး ဒီနိုင်ငံရေးလမ်းစဉ်မှာ မားမားမတ်မတ် ရပ်တည်နေဖို့က နံပါတ်(၁) အရေးကြီးဆုံး ဖြစ်ပါတယ်။
ဒုတိယအနေနဲ့ လူငယ်တွေသာမက တိုင်းသူပြည်သားတွေ အားလုံးသည်လည်းပဲ မိမိတို့ရဲ့ ရပိုင်ခွင့်၊ အခွင့်အရေးတွေကို သေသေချာချာ သိရှိနားလည်ကာ မိမိတို့ရဲ့ နိုင်ငံရေးလမ်းစဉ် ရဲရဲဝံ့ဝံ့ လက်ခံလျှောက်လှမ်းဖို့ လိုပါတယ်။ ဒီကိစ္စတွေကို လက်ရှိအချိန်မှာ (ပညာပေး)လုပ်ဆောင်နေပါတယ်။ နောက်ပြီးတော့ လာမယ့် ရွေးကောက်ပွဲမှာလည်း ၀င်ရောက်ယှဉ်ပြိုင်မှာ ဖြစ်ပါတယ်။ ဘာလို့ ရွေးကောက်ပွဲဝင်ရသလဲဆိုရင် ကျမတို့ရဲ့ အရေးကို ကျမတို့ဘက်မှာ ရပ်ပြီးပြောမယ့်သူ မရှိလို့ပါ။ လွှတ်တော်မှာ တိုင်းရင်းသားကိုယ်စားလှယ်တွေရှိသော်လည်းပဲ ကျမတို့ရဲ့ လိုအပ်ချက်နဲ့ အခွင့်အရေးတွေကို တောင်းဆိုတင်ပြမယ့်သူ မရှိပါဘူး။ လွှတ်တော်ထဲမှာ ပိုပြီးတော့ ထိထိရောက်ရောက် ပြောဆိုတင်ပြနိုင်လိမ့်မယ်လို့ ထင်တဲ့အတွက် ရွေးကောက်ပွဲဝင်မှာ ဖြစ်ပါတယ်။ ကျမတို့ ရှေ့ဆက်လုပ်ဆောင်ရမယ့် ကိစ္စတွေ အများကြီးရှိပါတယ်။ လူငယ်တွေကို ပြုစုပျိုးထောင်ရမယ်။ ဒီလိုကိစ္စတွေကို ဆက်လက်ဆောင်ရွက်နိုင်ဖို့ အခုကတည်းက ပြင်ဆင်နေပါတယ်။
စစ်ဖြစ်ပွားနေတဲ့ အတွက် စစ်ပြေးဒုက္ခသည်တွေ အများအပြား ဆင်းရဲဒုက္ခရောက်နေကြောင်း၊ ကချင်လွတ်မြောက်ရေးတပ်မတော်သားတွေလည်း ရှေ့တန်းစစ်မျက်နှာတွေမှာ အပြင်းအထန် ကြိုးစားတွန်းလှန်တိုက်ခိုက်နေကြောင်း သိရှိရပါတယ်။ ကချင်လွတ်မြောက်ရေးအစိုးရမှလည်း ဗမာ(မြန်မာ)အစိုးရနဲ့ နိုင်ငံရေး တွေ့ဆုံဆွေးနွေးမှုတွေ ပြုလုပ်ကာ ငြိမ်းချမ်းရေးရရှိဖို့ ကြိုးစားနေကြောင်း သိရပါတယ်။ ဒီအကြောင်းကိစ္စတွေအပေါ် ဆရာမရဲ့ သဘောထားအမြင်ကို ပြောပြပေးပါ။
ကျမတို့ ကချင်ပြည်မှာ သေနတ်ပြန်ဖောက်တာ (၈)လ ရှိလာပါပြီ။ ဒီကာလအတွင်းမှာ ဆင်းရဲဒုက္ခ ရောက်ကြရတယ်ဆိုတာ မှန်ပါတယ်။ စစ်မက်တိုက်ပွဲတွေ မရှိတဲ့ကာလတွေတုန်းကလည်း ကျမတို့ရဲ့ ပြည်သူတွေ အကြီးအကျယ် ဆင်းရဲဒုက္ခရောက်ခဲ့ကြရတာပါ။ ဟူးကောင်းလွင်ပြင်ဒေသမှာ ယုဇနကုမ္ပဏီက မြေဧက နှစ်သိန်းကျော်သိမ်းလိုက်လို့ မြောက်များစွာသော ပြည်သူတွေ ဒုက္ခပင်လယ်ဝေခဲ့ကြရတာပါ။ တိုင်းသူပြည်သားတွေခမျာ နေစရာ မရှိ၊ စားစရာ မရှိနဲ့ ဆင်းရဲဒုက္ခရောက်ကြတယ်။ အစားအသောက်မရှိလို့၊ ဆေးဝါးကုသနိုင်ခြင်းမရှိလို့ သေဆုံးသွားကြရတယ်။ ကလေးတွေ ကျောင်းမတက်နိုင်ဘူး။ လူငယ်လူရွယ်တွေ ပျက်စီးသွားကြရတယ်။ ဒီကနေ့ စစ်ဖြစ်နေလို့သာလျှင် ပြည်သူတွေ ဒုက္ခရောက်တာ မဟုတ်ပါဘူး။ စစ်မဖြစ်တဲ့ အချိန်ကာလတွေမှာလည်း ဆင်းရဲဒုက္ခတွေကို အကြီးအကျယ် ခံစားဖြတ်သန်းခဲ့ကြရတာပါ။ ဒီကနေ့အထိလည်း ဒုက္ခရောက်နေကြတုန်းပါပဲ။ စခန်းတွေမှာ ရောက်ရှိနေတဲ့ စစ်ပြေးဒုက္ခသည်တွေလည်း ပင်ပန်းဆင်းရဲနေကြရပါတယ်။ အထူးသဖြင့် ရှမ်းပြည် ဖောင်းဆိုင်၊ အင်ဘော်ပါ စတဲ့ ဒေသတွေမှာ အကူအညီရောက်ရှိမှု နည်းတဲ့အတွက် ပိုပြီးဆင်းရဲဒုက္ခရောက်ကြကြောင်း သိရပါတယ်။ အင်မတန် ချမ်းတဲ့အချိန်ကာလမှာ ၀တ်စရာ အနွေးထည်မရှိ၊ အမိုးအကာမရှိတဲ့ နေရာတွေမှာ နေထိုင်ကြရတာပါ။ အမိုးအကာနဲ့ လုံလုံခြုံခြုံနေရတဲ့ နေရာတွေမှာလည်း အချို့က စားစရာဆန်ပဲ ရှိပြီး ဟင်းလျာချက်ပြုတ်စားသောက်ဖို့ မရှိဘူး၊ နေမကောင်းဖြစ်ရင် သောက်သုံးဖို့ ဆေးဝါးမရှိဘူး စတာတွေကို ကြုံတွေ့နေကြတယ်။ နေရာဒေသအချို့မှာ ကလေးတွေ ကျောင်းမနေနိုင်ဘူး။ ထွက်ပြေးတိမ်းရှောင်လာရတဲ့အတွက် ကျောင်းမတက်နိုင်တာ၊ တချို့က သူတို့တိမ်းရှောင်ရောက်ရှိနေတဲ့ နေရာနဲ့ စာသင်ကျောင်း ကွာဝေးလွန်းတာ စတဲ့ အကြောင်းအမျိုးမျိုးကြောင့် ကလေးငယ်တွေ ကျောင်းမနေနိုင်၊ စာမသင်ကြားနိုင် ဖြစ်နေရပါတယ်။
ပြည်သူလူထုကို ဘယ်လောက်ထိ နှိပ်စက်သလဲဆိုတော့ ကလေးတွေကို စာသင်ကြားပေးတဲ့ ဂေဟာမှာလည်း ဗုံးလာခွဲတယ်။ တောင်ယာသွားတဲ့သူတွေကိုလည်း အသားလွတ် ပစ်သတ်တယ်။ ဒီလို နည်းလမ်းပေါင်းစုံနဲ့ နှိပ်စက်တာတွေကိုလည်း ခံခဲ့ကြရပါတယ်။ အမျိုးသမီးတွေကို အနိုင်ကျင့်စော်ကားတဲ့ ကိစ္စတွေလည်း အမြောက်အများ ဖြစ်ပွားခဲ့ပါတယ်။ ယောက်ျားတွေ့ရင် ပေါ်တာဆွဲတယ်၊ မိန်းမနဲ့ကလေးတွေကိုတော့ လူသားဒိုင်းသဖွယ်အသုံးပြုတယ်။ နည်းလမ်းပေါင်းစုံနဲ့ စော်ကားနေကြပါတယ်။ ရွာမှာမနေရဲလို့ ထွက်ပြေးသွားတဲ့ရွာတွေကို မီးရှို့တယ်၊ ရိတ်သိမ်းထားတဲ့ ကောက်ပဲသီးနှံတွေကို မီးရှို့ဖျက်ဆီးတယ်။
ဒီတော့ စစ်မီးငြိမ်းသွားခဲ့ရင်တောင် ပြန်စရာအိမ်မရှိတဲ့အဖြစ်ဆိုတော့ ပြန်လည်ထူထောင်ရေးအတွက်လည်း အများကြီးလုပ်ရဦးမှာပါ။ ဒါ့ကြောင့် ကျမတို့ရဲ့ သွေးချင်းညီအစ်ကိုမောင်နှမတွေအတွက် ပြန်လည်ထူထောင်ရေးသည်လည်းပဲ ကျမတို့ အားလုံးရဲ့ တာဝန်ဖြစ်ပါတယ်။
ငြိမ်းချမ်းရေးကိစ္စအတွက်တော့ ခေါင်းဆောင်ကြီးတွေ ဆောင်ရွက်နေကြပါတယ်။ ရှေ့တန်း စခန်းအသီးသီးမှာ ရဲဘော်ရဲဘက်တွေ ကြိုးပမ်းအားထုတ်နေကြပါတယ်။ ငြိမ်းချမ်းရေးကိစ္စပြောမယ်ဆိုရင် လွန်ခဲ့တဲ့(၁၇)နှစ်တိုင်တိုင် အပစ်ရပ်ခဲ့ကြပါတယ်။ ငြိမ်းချမ်းရေးလို့ ပြောတဲ့ ဒီအပစ်ရပ်ကာလမှာ တိုင်းသူပြည်သားတွေ အလွန် ဆင်းရဲဒုက္ခရောက်သွားခဲ့ရပါတယ်။ လယ်ယာမြေတွေ သိမ်းခံရတယ်။ ဒီစစ်အေးတိုက်ပွဲကာလမှာ ကျမတို့ အင်မတန် ကျရှုံးသွားခဲ့ရပါတယ်။ အခုလည်းပဲ အရင်လိုအပစ်ရပ် ငြိမ်းချမ်းရေးပုံစံပဲ ပြန်သွားမယ်ဆိုရင်တော့ ဘာမှမထူးပါဘူး။ ဗမာအစိုးရရဲ့ လှည့်ဖြားမှု၊ ကလိန်ကျမှု နောက်တစ်ခေါက် ထပ်မခံရဖို့ လိုပါတယ်။ ကျမတို့ ထပ်မှားလို့ မရပါဘူး။ ထပ်မှားခဲ့မယ်ဆိုရင်တော့ ကျမတို့ တိုင်းပြည်နဲ့လူမျိုးရဲ့ အနာဂတ်ဟာ ပိုမို ဆိုးရွားသွားပါလိမ့်မယ်။ ဒီဗမာအစိုးရက ကျမတို့ကို ဘယ်လိုနည်းနဲ့မှ မနိုင်တဲ့အတွက်ကြောင့်သာ သည်းခံကာ တွေ့ဆုံဆွေးနွေးနေခြင်း ဖြစ်တယ်ဆိုတာ နားလည်ဖို့ လိုပါတယ်။ ကျမတို့ရဲ့ ရိုးသားပွင့်လင်းမှုကို အခွင့်ကောင်းယူကာ လှည့်ဖြားနေကြတဲ့ ဒီဗမာအစိုးရရဲ့ သွေးဆောင်မှုအောက် ကျဆုံးရောက်ရှိ မသွားဖို့ ဖန်ဆင်းရှင်ထာဝရဘုရားသခင်ထံ ကိုးစားဆုတောင်းခြင်းဖြင့် တိုင်းသူပြည်သားတွေအားလုံး လက်တွဲညီညီ လျှောက်လှမ်းကြမယ်ဆိုရင် ကျမတို့ လိုချင်တဲ့ ပန်းတိုင်ကို ရောက်ရှိနိုင်မှာ ဖြစ်ပါတယ်။
ကမ္ဘာတ၀ှမ်းလုံးမှာ ရောက်ရှိနေကြတဲ့ ကချင်လူမျိုးတွေအတွက် အမှာစကားပြောကြားပေးပါဦး။
တိုင်းပြည်ဒေသအသီးသီးကို ရောက်ရှိနေကြတဲ့ ကချင်ညီအစ်ကိုမောင်နှမတွေကို ကျေးဇူးတင်ပါတယ်။ ကျမတို့ မြန်မာနိုင်ငံသား၊ ကချင်လူမျိုးဖြစ်ခွင့်ရခြင်းဟာ ဘုရားသခင်ရဲ့ ကျေးဇူးတော်သက်သက် ဖြစ်ပါတယ်။
ဒီကနေ့ စစ်တိုက်နေကြနေတယ်ဆိုပေမယ့် ကျမတို့ဟာ အမှန်တရားဘက်မှာ ရပ်တည်နေကြတဲ့အတွက် ကချင်လူမျိုးတွေအားလုံးရဲ့ ဂုဏ်အဖြစ် မှတ်ယူကြရမှာပါ။ စစ်ပွဲတွေနဲ့ ပင်ပန်းဆင်းရဲခက်ခဲမှုတွေအတွက် ညည်းတွားနေစရာအကြောင်း မရှိပါဘူး။ ကျမတို့ အားလုံးရဲ့ တာဝန်ဖြစ်ပါတယ်။
အားလုံးအတွက် ကောင်းမွန်တဲ့ လမ်းစဉ်ဖြစ်တဲ့အတွက် ကျေးဇူးတော်ကို ချီးမွမ်းကာ အားလုံးဆက်လက်ကြိုးစား အားထုတ်သွားမယ်ဆိုရင် ဘုရားသခင်က တည်ငြိမ်အေးချမ်းတဲ့ ခါနန်ပြည်သစ်ကို ခေါ်ဆောင်သွားလိမ့်မယ်ဆိုတာကို ယုံကြည်ခြင်းအားဖြင့်၊ ဆုတောင်းခြင်းအားဖြင့်၊ ညီညွတ်ခြင်းအားဖြင့် ရှေ့ဆက်လျှောက်လှမ်းကြပါစို့။
